窮的是年輕人父母

原來壹仔先至係炒股票的最佳指引。佢一講主場滅聲之謎，提及幾間上市公司，上星期五股價升到飛天。可以一個早上升接近十倍，而且是不問價錢一直買上，咁仲唔係催化劑投資法的最佳示範？

我身邊好鬼多專業人士，個個到咗呢個年紀都差不多定晒型，其中一個大玩家係我偶像。大玩家呢個名絕對無貶意，亦唔係話佢係什麼花弗公子。剛剛相反，大玩家非常踏實，作為一個專業人士，乜師物師，佢真正係讀書讀到過晒籠，靠自己有車有樓。外表上佢絕對稱唔上玩家，甚至可以稱得上宅男。不過，大玩家識得玩嘅十隻手指數唔晒，而且逢玩必精。HiFi、手表、單車、滑雪、汽車、旅行……佢玩得精唔係玩得貴，蔗渣價錢玩出燒鵝味道，係識玩而唔係用錢撻人嗰種。佢仲係少數IQ分數高過我嘅人，所以大玩家玩得叻，係有科學根據。

窮的是年輕人父母

無端端講起大玩家，係因為佢對於而家啲年輕人有深刻體會。我哋成日擔心年輕一代唔夠人爭，為佢哋憂心。但係大玩家話，佢哋先至唔會擔心。年輕人做事，半年無乜成功感，收工，唔做，遲吓再算。我哋做嘢為咗搵食，佢哋做嘢係為感覺。唔做，返去食阿爸阿媽，搞掂。要擔心，應該擔心年輕人嘅老竇老母，究竟搵得夠唔夠，可以養個仔過世。

千金難買少年窮，但係要窮都唔係容易。你出世如果屋企唔係綜援家庭，父母為你供應資源，你點都唔會有窮的感覺，窮的只係你父母。

其實唔使為佢哋擔心，全世界年輕人都係一樣。佢哋有冇競爭力，佢哋最清楚，況且佢哋競爭已經唔係鬥勤力，係鬥一啲我哋唔識嘅嘢。大玩家睇通時勢，唔同啲凡夫俗子癲，最近訂了部好好聲又抵嘅HiFi。